អបអរសាទរពិធីខួបអនុស្សាវរីយ៍លើកទី៤៨ ទិវានៃការចងចាំដំណើរឆ្ពោះទៅការផ្តួលរំលំរបបប្រល័យពូជសាសន៍ ប៉ុល ពត (២០ មិថុនា ១៩៧៧ – ២០ មិថុនា ២០២៥) ក្រោមអធិបតីភាព ឯកឧត្តម នាយឧត្តមសេនីយ៍ ទៀ សីហា ឧបនាយករដ្ឋមន្រ្តី រដ្ឋមន្រ្តីក្រសួងការពារជាតិ តំណាងដ៏ខ្ពង់ខ្ពស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា នៅតំបន់ប្រវត្តិសាស្ត្រយោធាតេជោកោះថ្ម អុិច១៦ ស្ថិតនៅឃុំទន្លូង ស្រុកមេមត់ ខេត្តត្បូងឃ្មុំ។
ថ្ងៃនេះ៤៨ឆ្នាំមុន ជាថ្ងៃដែលសម្តេចតេជោ ហ៊ុន សែន នៅជាយុទ្ធជន ហ៊ុន សែន ក្នុងវ័យ ២៥ឆ្នាំ រួមនិងយុទ្ធមិត្តដ៏ស្ម័គ្រស្មោះ ៤រូបទៀត បានសម្រេចចិត្តក្នុងស្ថានភាពដ៏តានតឹងបំផុតដោយយកជីវិតធ្វើជាដើមទុន លាចាកទឹកដី លាចាកឧត្តមភរិយានិងកូនក្នុងផ្ទៃជាទីស្រឡាញ់ ឆ្លងកាត់ព្រំដែន ទាំងគ្រោះថ្នាក់បំផុតឆ្ពោះទៅកាន់ប្រទេសវៀតណាម ដើម្បីស្វែងរកគាំទ្រក្នុងការរំដោះជាតិ និងប្រជាជនកម្ពុជា ពីរបបប្រល័យពូជសាសន៍ដ៏ឃោរឃៅ ប៉ុល ពត ។
៤៨ឆ្នាំកន្លងទៅ នៅថ្ងៃនេះ ប្រជាពលរដ្ឋខ្មែរ ដែលនៅរស់រានមានជីវិតបន្ទាប់ពីរបប ប៉ុល ពត ប្រហែលតែ ៤.៥ លាននាក់ ក្នុងឆ្នាំ ១៩៧៩ (សល់ពីចំនួនប្រជាជនប្រហែល ៨ លាននាក់ មុនឆ្នាំ ១៩៧៥) ត្រូវបានជួយសង្គ្រោះ ដោយវីរបុរសខ្មែរ សម្តេច តេជោ ហ៊ុន សែន ឲ្យបានរស់រានមានជីវិត ចេញផុតពីស្ថានភាព បែកបាក់គ្រួសារ គ្មានការអប់រំ គ្មានជំនឿសាសនា គ្មានទីផ្សារ គ្មានអាហារ គ្មានការថែទាំសុខភាព គ្មានសិទ្ធសេរីភាព មានតែការកាប់សម្លាប់ដ៏សែនឃោរឃៅ និងការអស់សង្ឃឹម ប្រែមកបានរស់នៅដោយការជួបជុំសុខដុមរមនា មានសិទ្ធិសេរីភាពគ្រប់យ៉ាងក្នុងក្របខណ្ឌច្បាប់ មានការរីកសាយពូជសាសន៍ខ្មែរ រហូតដល់ ជាង១៧លាននាក់ ជាពិសេសគឺមានសន្តិភាពនិងការឯកភាពជាតិពេញលេញ ក្រោមការលះបង់ដ៏ខ្ពង់ខ្ពស់ របស់សម្តេចអគ្គមហាសេនាបតី តេជោ ហ៊ុន សែន ដែលបានយកជីវិតធ្វើជាដើមទុន ដើម្បីស្វែងរកការរំដោះជាតិនិងការរស់រានមានជីវិតរបស់ប្រជាជន ចេញពីរបបប្រល័យពូជសាសន៍ ប៉ុល ពត រហូតដាក់ចេញនូវនយោបាយ ឈ្នះ ឈ្នះ បញ្ចប់អង្គការចាត់តាំង នយោបាយនិងយោធាខ្មែរក្រហម នាំមកនូវ សន្តិភាពនិងការបង្រួបបង្រួមជាតិឯកភាពជាតិពេញលេញ ឯកភាពទឹកដី ក្រោមដំបូលរដ្ឋធម្មនុញ្ញតែមួយ រដ្ឋាភិបាលតែមួយ កងកម្លាំងប្រដាប់អាវុធតែមួយ ដែលជាមូលដ្ឋានគ្រឹះដ៏រឹងមាំក្នុងការស្តារ កសាង និងធានាបាននិរន្តរភាព នៃការអភិវឌ្ឍសង្គម និងបន្តនយោបាយដឹកនាំ ថែរក្សាសន្តិភាពនិងការអភិវឌ្ឍរយៈពេលវែង ដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា៕
